பெரிய கோவிலின் பெரிய கேள்விகள்

பெரிய கோவிலின் பெரிய கேள்விகள்

முதன்முறையாக நான் ஆசையோடு எதிர்பார்த்து காத்திருந்த அந்த நாள் வந்தது. தஞ்சையின் மணிமகுடமாய் திரவிட நாட்டின் நெற்களஞ்சியமாய் சைவர்களின் வரலாறை தாங்கி நிற்கும் தஞ்சை பெரிய கோயிலை காண வேண்டும் என்ற ஆசை அன்று நிறைவேறியது.

பற்பல எதிர்பார்ப்புகள் சிற்சில ஆசைகள் என தஞ்சை பழைய பேருந்து நிலையத்திலிருந்து நானும் சுமார் பதிமூன்று முறை அந்த கோயிலின் ஒவ்வொரு ஆதி அந்தத்தையும் அளந்து லயித்த என் நண்பனும் அங்கு சென்றோம்.

எனக்கோ ஒரே மயிர்கூச்சம் ஒரு புன்னிய ஸ்தலத்தை நோக்கி வருகிறோம் என்பதை தாண்டி ஆயிரம் ஆண்டு வரலாறை தாங்கி நிற்கும் ஒரு வரலாற்று பதிவை பார்க்க போகிறோம் என்ற ஆவள் தான் எனக்குள் இருந்தது ஆனால் தொடக்க முதலே எனை கேள்வி கணைகளால் என் நண்பன் துளைக்க நான் ஆடி போய்விட்டேன். அவன் கேட்கும் கேள்விகளுக்கு என்னால் பதில் கூற முடியவில்லை என்பதே உண்மை. இதோ அவன் வினவிய கேள்விகள்….

கேள்வி 1: “இவ்வளவு பெரிய கோயிலை கட்டிய மாமன்னன் பார் போற்றும் நாயகன் அருள்மொழிவர்மன் பொன்னியின் செல்வனாம் இராசராச சோழனின் சிலை ஏன் கோயிலுக்கு வெளியே இருக்கிறது என்றான்….”

“ஆமால ஏன் வெளில இருக்கு…”
நிச்சயமாக எதோ ஒரு அரசியல் ௐளிந்திருக்கும் என என் உள்மனது சொல்ல அதை நான் அவனிடம் சொல்ல அதற்கு “அப்பறம் சொல்றேன்” என அடுத்த கேள்வியை கேட்டான்….

கேள்வி 2: “ஒரு கோயிலுக்கு எதுக்கு அகழி”

“ம்ம்! கோட்டைக்கு தான் அகழி இருக்கும் கோயிலுக்கு எதுக்கு ஒருவேள இங்க இருந்து ஆட்சி செஞ்சாங்களா….”

“அதலாம் இல்ல! சரி வா” என்றான்.

கேள்வி 3: “நீ எங்க வேணாலும் போட்டோ எடுக்காலாம் போன வாட்டி வந்தப்ப கருவறையவே எடுத்தாய்ங்க ஏன்னா தமிழ்நாட்டுல சின்ன சின்ன கோயில்லாம் அறநிலையதுறை கட்டுப்பாட்டுல இருக்கு ஆன இவ்ளோ பெரிய கோயில் அவங்க கட்டுப்பாட்டுல இல்ல”

“ஏன் தெரியுமா?”

“என்னது அறநிலையத்துறை கட்டுப்பாட்டுல இல்லயா….”

கேள்வி 4: “இந்த கோயில் சைவ ஆகம விதிப்படி கட்டல “

“ஆமா! கொடிமரம், பலி பீடம், விமானம், கோபுர கலசம், நந்தி எல்லா புது அமைப்புல இருக்கு…”

கேள்வி 5: “இந்த கோயில்ல உற்சவர் பிரதிஷ்ட பண்ணது எப்ப தெரியுமா…

கோயில் கட்டுனப்ப உற்சவரே இல்ல அது தெரியுமா…”

“டேய் தல சுத்துதுடா…”

மெள்ள கோயிலின் கருவறையை நோக்கி நடந்தோம்…

ஒரே சிலிர்ப்பு பிரம்மாண்டமான சிவ லிங்கமாக பெருவுடையாரை பார்த்த பெருமிதம்….

கேள்வி 6: “சந்நதி நுழைவுல யார் வரவேற்குறாங்க பார்த்தியா…”

“என்னடா இது :0 !!!!

ம்ம் விநாயகர் ஒகே, வலப்பக்கம் முருகர்ல இருக்கனும் துர்கை இருக்காங்க…”

“விடு விடு வா…”

கேள்வி 7: “கருவறை நுழைவு தூண்கள பார்த்தியா, கருவறை முகப்பு பார்த்தியா???”

“என்னடா சிற்ப வேலைப்பாடுகளே இல்ல….”

“ஆஹா! அருமையான தரிசனம் நிம்மதியா  சாமி பார்த்தோம்ல”

“நீ எப்ப வந்தாலும் இப்படி பார்க்கலாம்”

பொடி நடையாக வெளியே வந்தோம் எதோ ஒரு நெகிழ்ச்சி சரியாக சொல்ல தெரியவில்லை

“டேய் கடைசியா ஒரு கேள்வி,

வா முருகர் சந்நதிக்கு போய் பேசுவோம்”

மெள்ள ரசித்து கொண்டே அங்கே சென்றோம்….

“டேய் செம சிற்ப வேலைப்பாடுகள்டா அழகோ அழகு….
முருகன் சந்நதி மட்டும் ஏன் இவ்ளோ வேலைப்பாடுகள்…”

கேள்வி 8: “ம்ம் மொதல்ல இந்த முருகன் சந்நிதி இங்க எப்ப கட்டுனாங்க தெரியுமா….

இதுக்குலாம் மொதல்ல பதில சொல்லு…

இங்க வரனும் வரனும் சொன்னீல பதில் சொல்லு…”

“எனக்கு நிஜமா தெரியாதுடா !” என தஞ்சை புது பஸ் ஸ்டாண்டுக்கு பயணமானோம்.

பொன்னியின் செல்வனை படித்துவிட்டு அருள்மொழிவர்மன் கட்டிய அந்த கோயிலை பார்க்க வேண்டுமென பேராவல் கொண்டு வந்தேன் ஆனால் வந்த இடத்தில் எனை யோசிக்க வைத்துவிட்டான் எனது நண்பன்.

வழிநெடுக யோசித்து கொண்டே வந்தேன் ஒருவாறு கண்டுபிடித்தேன் அதற்கு முன் அவன் வாயில் இருந்தே பிடுங்கிவிடுவோம் என்று மதுரை பஸ்ஸில் ஏறி உட்கார்ந்துவிட்டு நச்சரித்தேன் மெதுவாக சொல்ல ஆரம்பித்தான்….


– பிரசன்ன ரணதீரன் புகழேந்தி

ஹைக்கூவில் பிறந்தவளோ – பேதை

ஹைக்கூவில் பிறந்தவளோ – பேதை

இலையுதிர் கால இரண்டாம் திங்கள் மூன்றாம் சாமத்தில் ஜனித்தவளோ எனை முழுதும் ஆட்கொள்ள உதித்தவளோ….

கருவுக்குள் பூவாக பூத்தவளோ நந்தவன பூக்கள் பொறாமையுற வைத்தவளோ அந்த வானத்து விண்மீன் கூட்டம் கண்டேனடி உன் வருகையை எண்ணி களிக்க மகிழ்ந்தேனடி….

மூச்சை பகிர்ந்து உயிர் உடல் கொண்டாயடி
ஊண் பகிர்ந்து உடல் கொண்டாயடி
ஐஇரு திங்கள் இருளில் காத்திருப்பாயடி
எனக்காக….

காரிருள் கருவறையில் அத்தையவள் ஜதி சொல்ல நாட்டியம் அரங்கேற்றியவளோ 
மாமனவன் கூத்தாட எனை அங்கே மறந்தாயடி….

என் நினைவேற்க மனம் வளர்த்தாயடி
என் உயிர் ஏற்க உடல் வளர்த்தாயடி
எனை முழுதும் ஏற்க முழுமையானாயோ
அடி என்னவளே….

மாதுளை நிறம் கொண்டு இதழ் படைத்தான் திராட்சையின் வண்ணம் கொண்டு கண் வரைந்தான் சப்போட்டையின் தோல் கொண்டு உடல் செய்தானோடி அந்த பிரம்மன்…

மெய்வாய் திறந்து வீர் கொண்டு எழுந்தாயோடி கண்ணீர் வரத்தின்றி அழுதாயோடி எனை இவ்வுலகில் காண துடித்தாயோடி…

எட்டுத்திக்கும் ஒலித்ததோ மங்கள நாதமடி அது உன் அழுகுரல் தானடி மானும் மயிலும் அடுதடி குயிலும் கிளியும் பாடுதடி 
உனை இப்புவியில் வரவேற்க ஆனந்த கூத்தாடுதடி….

குருதியின் ஓட்டமும் தெரியுதடி பச்சை கொடிகளும் படருதடி தொப்புள்கொடியின் ஈரமும் காயுதடி பல்லில்ல வாயும் தெரியதடி….

மூன்றாம் அகவையில் நானிருக்க உன் முகம் பார்த்து ஆர்ப்பறிக்க உன் பிஞ்சு கைவிரல் தொட்டேனடி நீயோ சிலிர்த்தாயடி…

தத்தி தத்தி நீ தவள எட்டி பிடித்து நடைபயில உன் கால்கள் சிவக்க மனம் வலிக்குமடி பச்சரிசி சாதம்தனில் நெய்யிட்டு நீ உண்ணும் அழகை பார்த்து உச்சி கொட்டுமடி…

உன் பெயர் கேட்க நான் காத்திருக்க என் பேர் சொல்ல நீ வாயெடுக்க காற்றுக்கு கொஞ்சம் பஞ்சமடி உன் செவிதழ்கள் அதற்காக கெஞ்சுதடி…

அம்மையும் அப்பனும் மறந்து போய் பால் மணம் மாறது மாமன் என்று மழலை சொல் கேட்டேனடி அந்த சொல்லிலே முழுமையானேனடி அடி என்னவளே ஹைக்கூவில் பிறந்தவளே…

– பிரசன்ன ரணதீரன் புகழேந்தி

கம்பன் கஞ்சனடி – சிறுகதை

கம்பன் கஞ்சனடி – சிறுகதை

யாரும் பார்க்காத நேரமது சட்டென மணமகனை தள்ளிவிட்டு மணமகள் தலைதெறிக்க ஓடினாள். மண்டபவமே திடுக்கிட்டது. மணகோலத்தில் நடந்து வந்துகொண்டிருந்தவள் திடிரென ஓட்டமெடுக்க காரணமென்ன என  புலம்பியபடியே கண்ணாடி முன் நின்று யோசித்து கொண்டிருந்தாள் பர்வதம்.

அச்சமயம் “மா! மா! அம்மா” என வாசலில் நின்று கத்தி கொண்டிருந்தான் பலதேவா.

“டேய் என்னடா பிரச்சனை” என்று வினவியபடியே வந்தாள்.

“எதுக்கு மா கார்லாம் புக் பண்ணிருக்க ஆட்டோல போய்ட்டு வந்துருக்கலாம்ல”

“டேய் மானத்த வாங்காத டா வாடா” என்றாள் அவன் தாய் பர்வதம்.

நடுவே பலதேவன் தலையில் ஓங்கி ஒரு குட்டு வைத்துட்டு “டேய் இதுதான் கடைசி இதுக்கு மேல எங்களுக்கு தெம்பில்ல பேசமா சந்நியாசி ஆகிறு” என சிரித்து கொண்டே காரின் பின் சீட்டில் அமர்ந்தாள் பலதேவனின் அக்காள்.

“உங்களுக்குளாம் என்ன பார்த்த நக்கலா இருக்கு ம்ம்” என கடுகடுத்துக் கொண்டே பார்த்தான் பலதேவன்.

“என்னப்பா போலமா” என அவன் முதுகில் தட்டிவிட்டு காரின் முன் சீட்டில் ஏறினார் அவன் அப்பா பரந்தாமன்.

வண்டி புறப்பட்டது வழி நெடுக ஒரே புலம்பல். புலம்பி கெட்ட குடும்பம் போலும். “இந்த இடமாவது நல்லபடியா அமையனும் அதுக்கு அந்த காமாட்சி தான் அருள் புரியனும்” என்றாள் பர்வதம்.

“மா இதுவரைக்கும் இவனுக்கு 12 பொண்ணுங்கள பாத்துருக்கோம்…

அதுல 5 பொண்ணுங்க இவன பிடிக்கலனு சொல்லிருச்சுக …

4 ஜாதகம் சரில்ல 2 நிச்சயதார்த்ததோட முடிஞ்சு..

இன்னும் 1 கல்யாணம் வரைக்கும் போய் நின்றுச்சு..

எனக்கு என்னமோ இவனுக்கு கல்யாணம் ஆகும்னு நம்பிக்க இல்ல” என படபடவென பொறிந்தாள் பலதேவனின் அக்காள்.

“மா இவள பேசாம வர சொல்லு” என எச்சரித்தான் பலதேவன்.

“அடியேய் சும்மா இரேன்டி”

“ஏனடா இந்த லவ் கிவ் பண்ணி எங்காவது ஓடகூடாது ஆனா அதுக்கும் உனக்கு திறமை இல்ல, வேஸ்ட் பெல்லோடா நீ”

“மாஆஆஆஆஆ” என மறுபடியும் ஒரு எச்சரிக்கை குரல்.

பரந்தாமனும் திரும்பி முறைப்பு காட்ட ஒருவாறு பேச்சு அடங்கியது சேர வேண்டிய இடமும் வந்தது.

வாசலிலே நல்ல வரவேற்பு, பெண்னை பெற்றவளும் வளர்த்த தமையனும் வாய் நிறைய வாங்க என்று அழைத்து குசலம் விசாரித்தனர்.

“சடகோப தரகர் தான் சொன்னாரு போட்டோலே பிடிச்சு போச்சு அதான் வந்துட்டோம்” என்றார் பரந்தாமன்.

“ரொம்ப சந்தோஷம்ங்க!

மா காப்பி டிபன்” என்றபடி அம்மாவை பார்த்தான்.

குணவதியின் அம்மாவும் காப்பியுடன் கொஞ்சம் மிக்சரும் வைத்து கொடுத்து கொண்டே வந்தாள் கடைசியாக மாப்பிள்ளையிடம் வந்தாள்.

“ம்ஹூம் நான் காப்பி டீ லாம் சாப்புடுறது இல்லங்க”என மிக்சரை மட்டும் எடுத்துக்கொண்டு நெளிந்தான் பலதேவன்.

“ஆமாங்க என் பிள்ளைக்கு காப்பி டீ மட்டுமில்ல வேற எந்த கெட்ட பழக்கமும் இல்ல இந்த வயசுலே அநாவசியமா எதும்  செலவழிக்கமாட்டானா பாத்துக்கோங்க! நிறையா சேர்த்து வைப்பான் கொஞ்சம் கஞ்சம் தான் ஆனா தனக்கு மனைவியா வர போறவளுக்கு நிறையா இப்பவே சேர்த்து வச்சுருக்கான்” என தன் மகனை பற்றி ஒரு நீண்ட புகழ் பாடினாள் எல்லாம் குட் புக்ஸில் இடம் பெற தான்.

மெள்ள பர்வதம் காதில் வந்து கிசுகிசுத்தான் “மா நீ பொண்ணு பாக்க வந்தியா இல்ல என்ன அசிங்கப்படுத்த வந்தியா…

இப்ப எதுக்கு இதலாம் உளறிட்டு இருக்க”

“டேய் நீ சும்மா இருடா” என மகனின் தொடையில் கிள்ளினாள்.

“ஏங்க பொண்ணு ஊருக்கு எதும் போய்ருக்காங்களா!

ஏன்னா… ஆபிஸுக்கு 2 அவர் தான் பர்மிஷன் போட்டுருகேன் லேட்டா போனா லாஸ் ஆப் பே ஆகிரும் அதான் கேட்டேன்” என பரபரத்த குரலில் கேட்டான் பலதேவன்.

“டோட்டல் டேமேஜ்…

இவன எதுக்குமா கூட்டிட்டு வந்த”
என பர்வதத்தின் காதாண்டே முனங்கினாள் அக்காள்.

“அப்படிலாம் ஒன்னுமில்லங்க பொண்ணு இங்க தான் இருக்கு..
இந்தா வர சொல்ரேன்…
மா” என கண்ணசைவிலே அன்னையிடம் 
சொன்னான் அண்ணன்.

மெல்லிய கொளுசின் இனிய ஓசை, மல்லிகையின் மயக்கும் மன்மத வாடை என அவள் வரும் முன்னே அவ்விடம் கொஞ்சம் சிலிர்த்தது. எலுமிச்சை மஞ்சள் பட்டு புடவையில் அகண்டு சிவந்த சிவப்பு ஜரிகை. முந்தானையின் சரி பாதியை அவள் கார்கூந்தல் அளந்தது, இடுப்பு சீலையின் இடத்தே சில சுருக்கங்கள் ஓளிந்திருந்தன அநேகமாக இதை மூன்றாவது முறையாக உடுத்திருப்பாள். தொண்டை குழியின் நடுவே அந்த சிறிய மச்சத்தின் இடயே வியர்வை முத்துகள் வழிந்தோடின. மாதுளை செவ்விதழ்கள் சிவக்க மூக்குத்தியின் சுடெரொளியில் அவள் கயல்கள் நஞ்சு குழம்பாக மின்ன கதவோரம் கடைக்கண் பார்வை கொண்டே வந்தாள். கண்ணுக்கிட்ட காஜல் இரு புருவம் இணைக்க வைத்த கோபால பொட்டு வகுந்தெடுக்காத மயிரிழையின் நடுவே அந்த சுட்டி காதோரம் ஆட்டமிட்ட ஜிம்மிக்கி என அவள் ரதி வதனம் அவளை தேவலோக கண்ணிகை போல  காட்சிப்படுத்தியது.

இராமனே அவளை பார்த்திருந்தால் கொஞ்சம் சபலப்பட்டிருப்பான் சூர்ப்பனகையை கண்டதுபோல் இவனோ அற்ப மானுடன் தானே நஞ்சை வெகுவாக அவன் உள்ளத்தில் பாய்ச்சி கொண்டான்.

பலதேவன் விஷம் குடித்தவன் போல துடிதுடித்தான். எத்தனையோ பெண்களை பார்த்திருக்கிறான் ஆனால் இவளை போல எவளும் அவன் மனதில் நஞ்சை செலுத்தியதில்லை. அது உண்மையிலே ஒரு ரசாயன மாற்றம் தான் எங்கோ தலைக்குள் முனுமுனுத்து கொண்டே இருக்கும் ‘இவள் எனக்கானவள்’ என்று.

“பொண்ண நல்ல பாத்துக்கடா அப்புறம் நான் சரியா பாக்கலனு சொல்லிராத” எனக் கூறி பரந்தாமன் ஓங்கி சிரித்தான்.

“நீயும் தான்மா மாப்பிள்ளைய நல்லா பாத்துக்கோமா… மாப்பிள்ளைய பிடிச்சிருக்குல” என எதோ கவலை தொனித்த குரலில் கேட்டான் குணவதியின் அண்ணன்.

“நான் அவர்ட்ட தனியா பேசனும்” என கவ்விய குரலில் கூறினாள் குணவதி.

சட்டென அவள் தாய்க்கு என்ன சொல்வதென தெரியவில்லை குணவதியை பார்த்து முறைத்தாள்.

“இதுல என்ன இருக்கு பேசட்டும் நாளபின்ன வாழபோறவங்க…

போடா போய் பேசிட்டு வா” என அதட்டினார் பரந்தாமன்.

நடுவே “மா! இந்த பொண்ணும் இவன பிடிக்கலனு சொல்ல போது” என பர்வதம் காதில் எச்சரித்தாள் பலதேவன் அக்காள்.

இப்போது இருவரும் தனிமையில். ஒரு நிமிடம் நீண்ட நிசப்தம். குணவதியே பேச்சை தொடங்கினாள்.

“என்ன பிடிக்கலனு சொல்லிறீங்களா!”

பலதேவனுக்கு கொஞ்சம் அதிர்ச்சிதான்.

“ஏங்க என்ன பிடிக்கலயா”

“இல்ல, அப்படிலாம் ஒன்னுமில்ல”

“பின்ன ஏங்க அப்படி சொல்ல சொல்றீங்க!
வேற யாரயாவது லவ் பண்றீங்களா?”

“இல்லங்க! பிடிக்கலனா பிடிக்கலனு சொல்லுங்களேன்”

“அப்படிலாம் சொல்லமுடியாது… எனக்கு உங்கள ரொம்ப பிடிச்சிருக்கு…”

“புரிஞ்சுகோங்க ப்ளீஸ்”

“நோ… நான் போய் உங்கள பிடிச்சிருக்குனு சொல்ல போரேன்” என கூறி கதவோரம் வந்தான் திடிரென குணவதியின் குரல் தடுத்தது அதை கேட்காமலே சென்றிருக்கலாம் ஆனால் கேட்டுவிட்டான்.

“எனக்கு ஏற்கனவே கல்யாணமாகிறுச்சு” என சொல்லும்போதே அவள் கண்கள் கலங்கின.

“என்னது புரில”

ஆம் அவளுக்கு கல்யாணமாகிவிட்டது. கல்யாணமாகி பின்பு தாயாகி இப்போது தனியாகி  நிற்கிறாள். நூற்றில் பத்து பெண்களுக்கு நடக்கும் கதை தான் அது கடைத்தெருவில் சீலை எடுக்க நூறு கடையேறி இறங்கும் பெண்கள் தன்னவனை தேர்ந்தெடுக்கும் போது அந்த ஆண்ணின் மனதை கூட ஏறி பார்த்ததில்லை பார்ப்பதுமில்லை பார்க்கபோவதுமில்லை. அவள் கதையை அவள் வாயால் சொன்னால் அவள் மனம் ஆறுதலடையும். ஆகயால் அவளே சொல்லட்டும். தொண்டையில் வார்த்தை வராமல் சிக்கிய போதும் மடையை திறந்து அனைத்தையும் கொட்டினாள்.

“ஆமா! எனக்கு கல்யாணமாச்சு மூனு வருஷத்துக்கு முன்னாடி அம்மா அப்பா ஆசை ஆசையா பண்ணி வச்சாங்க…

நானும் ரொம்ப சந்தோஷமா தான் இருந்தேன் ஒரு ஆறு மாசம் அப்புறம் இன்னும் சந்தோஷமா…

ஏன்னா அப்ப நான் இரண்டு உயிரா இருந்தேன் ஆன எதிர்பாராத விதமா என்னோட இன்னொரு உயிரு என்னோடையே போயிருச்சு…

அப்ப ஆரம்பிச்சது தான், ஒரு வருஷம் வரைக்கும் போச்சு அப்புறம் சுத்தமா நின்றுச்சு கோர்டே அத செஞ்சிருச்சு…” இப்போது அவள் கண்ணீர் அவள் மூக்குத்தியின் வழியே வழிந்து வியர்வையுடன் கலந்தது.

“இப்பலாம் எனக்கு ஆம்பளைங்கனாளே ஒரு வெறுப்பு, அவங்ககுள்ள ஒரு பேய் இருக்கு அது ஒரு சந்தேக பேய்….

பின்ன! சந்தேகப்படுற ஆம்பளயவே கடவுளா வச்சு கும்பிட்டா அப்படி தான இருப்பய்ங்க….

போதும்ங்க இதுக்கு மேல எதுவும் வேனாம். எங்க வீட்ல இதலாம் சொல்லியிருக்க மாட்டாங்க. உங்களுக்கு கண்டிப்பா ஒரு நல்ல பொன்னு கிடைப்பா. என்ன வேணாமுனு சொல்லிருங்க ப்ளீஸ்…” என்று சொல்லி முடிப்பதற்குள் அவள் கண்களில் தாரை தாரையாக கண்ணீர் அழட்டும் சுமார் மூன்றாண்டுகள் தேக்கி வைத்ததெல்லாம்  கொட்டி தீர்க்கட்டும். இனி அவள் கண்களில் கண்ணீர் வரத்தின்றி வறண்டு தான் போகட்டுமே.

அவள் சொன்னதெல்லாம் அவனை என்னனவோ உண்டு பண்ணியது. தீர்க்கமாக அவனுக்குள் ஒரு முடிவு இல்லை. மெள்ள வந்து அமர்ந்தான் கொஞ்சம் தண்ணீர் கேட்டான். இதன் நடுவே பர்வதம் காதுகளில் வந்து கிசுகிசுத்தாள் அவள் மூத்த மகள் ‘மா பொன்னு வந்து பிடிக்கலனு சொல்லும் பாரு’.

குணவதியின் அண்ணன் கொஞ்சம் இறங்கி “மாப்பிள்ள பொண்ண பிடிச்சுருக்கா?” என்றான்.

கொஞ்சம் அமைதி நிலவியது. மீண்டும் கேட்டான் அண்ணன். எல்லோரும் ஆவலுடன் இருந்தனர். ஒரு வழியாக ஒரு பெரு மூச்சு விட்டு தயாரானான்.

“இந்த கல்யாணதுல எனக்கு இஷ்டமில்ல! 
உங்க பொண்ண எனக்கு பிடிக்கல…
மா வா போலாம்” என சரமாரியாக பதிலளித்துவிட்டு சென்றான்.

வாசலில் நின்று திரும்பி பார்த்தான் உட்கதவோரம் விரக்திசிரிப்பை உதிர்த்தபடி அவனை பார்த்துக்கொண்டிருந்தாள் குணவதி. சீதையை பார்த்த இராமனை போல அந்த பார்வை ஆயிரம் கதைகள் சொன்னது.

மெள்ள நாட்கள் சென்றன. சுமார் பதிமூன்று நாட்கள் கடந்துவிட்டன. அது ஒரு மாலை பொழுது. குணவதியின் வீட்டு கதவு தட்டப்பட்டது வாசலில் அவன் தான் பலதேவன். அவனை பார்த்தவுடனே கோபாக கேட்டாள் அவள் அம்மா “பிடிக்கலைனு போனிங்க இப்ப எதுக்கு வந்திங்க”

“எனக்கு எல்லா உண்மையும் தெரியும், இன்ஃபாக்ட் என்ன பிடிக்கலனு சொல்லிருங்கனு சொன்னதே உங்க பொன்னு தான்”

இதை கேட்ட அந்த நிமிடமே ஸ்தம்பித்தாள் குணவதியின் தாய். மேற்கெண்டு பேச அவள் வாய் வரவில்லை.

பின்பு குணவதியிடம் தனியாக பேசவேண்டுமென வேண்டுகோள் விட்டான் கோள் கிடைத்துவிட்டது போலும் அன்று பேசிய அதே அறை காத்து கொண்டிருந்தது. பலதேவன் இரண்டு கட்டையில் பேச ஆரம்பித்தான்.

“என்னடா அன்னைக்கு பேசாமா போனவன் இன்னைக்கு வீடு தேடி வந்துருக்கேனு பாக்குறீயா…

சத்தியமா! என்னால முடியல அன்னிக்கு நீ சொன்னத சொன்னேனே தவிர என் அடிமனசுல இருந்து அத நான் சொல்லல…

எனக்கு உன்ன ரொம்ப பிடிச்சிருக்கு என்ன கல்யாண செஞ்சுகிறியா???

ம்ம் செஞ்சுகிறியா..

என்ன கஞ்சம்னு அம்மா சொல்லிருப்பாங்க. ஆமா! நான் கஞ்சம் தான். என் மூளவேன கஞ்சமா இருக்கலாம் ஆனா என் மனசு கஞ்சமில்ல அதுல எந்த வஞ்சமுமில்ல… உன் பதிலுக்காக தான் காத்திருக்கேன் சொல்லு”

இதை கேட்ட அவளுக்கு அழுவதா சிரிப்பதா என்று தெரியவில்லை நவரசத்தை தாண்டி தசரசத்தை எதும் முயற்ச்சித்தாளோ என்னவோ அவனை இன்னும் ஏறெடுத்து அவள் பார்க்கவில்லை. அவள் அடர்குழல் தவிர அவனுக்கும் ஒன்றும் தெரியவில்லை பெண்களை நேருக்கு நேர் பார்த்து பேசும்போதே அவர்கள் என்ன நினைக்கிறார்கள் என்று தெரியாதபோது அவள் பின்னழகை கொண்டு என்ன கனித்துவிடமுடியும். ‘என்ன கல்யாணம் செஞ்சுகுறியா’ என்ற வார்த்தை அவள் காதுகளை சுற்றி வட்டமிட்டு எதிரொலித்த காரணத்தினால் தானோ அவன் பிற்பாடு கூறியதை அவள் காதுகள் கேட்க தவறிவிட்டது. அது மீண்டும் மீண்டும் அவள் காதுகளில் எதிரொலித்து மந்தமாக்கியது. ஆனால் அவன் மறுபடியும் இசைத்தான் “என்ன கல்யாணம் செஞ்சுகுறியா”.

– பிரசன்ன ரணதீரன் புகழேந்தி

ஹைக்கூவில் பிறந்தவளோ

ஹைக்கூவில் பிறந்தவளோ

#1 காதலை கண்டு கடவுளும் பயப்படுகிறான்   எங்கே கண்ணீர் சிந்த நேர்ந்திடுமோ என்று… 

#2 அந்த கயவன் மரணத்தை சூட்சமமாக வைத்தான் ! அதை ஏன் உன் கண்களில் வைத்தான் பெண்ணே ? 

#3 முற்றத்திலிருந்த காற்றுகூட எனை தீண்ட மறுக்கிறது நீ எனை வெறுத்ததால்  

#4 பெண்ணே! உன்னை கேசாதி பாதம் வரை பாட என்னால் இயலாது ஏனென்றால் உன் கயல் விழியை பாடவே என் ஆயுள் பத்தாது!

#5 உன் கார்குழலிடை அசைவு வெளியிடும் காற்று போதும் என் ஆயுள் முழுதும் நான் சுவாசிக்க

#6 தீயினை கொண்டு நெருப்பினை அணைக்கும்போது தான் அவள் பார்வையின் ஆளுமை புரியும்

#7 உதடுகள் பேச துடிக்கும் போதுதான் வார்த்தைகள் மௌனிக்கின்றன…

#8 அவள் மூக்குத்தியின் சுடரொளியில் தெரிகிறது என் முகம் அதன் பிம்பத்தில் தெரிவதோ அவள் மனம்.

#9 அவள் கண்ணீர் துளி ஒவ்வொன்றையும் சேமித்தேன் என் பாபங்களை அளக்க….

#10 அவள் வியர்வை துளிகளை சேகரித்து தெறிக்கப்பட்டது தான் அந்த வானத்து நட்சத்திரங்கள்…. 

#11 தூரத்து அவள் முக சினுங்கலிலும் கண் ஜாடையிலும் தான் வாழ்கிறது என் காதலும் கவியும்… வாழிய குறிப்பறிதல்…
#12 அவள் கண்ணின் கரு மை போதும் என் வரலாற்றை எழுத…

#13 அவள் இடக்கண் ‘ஹை’ என்றால் அவள் வலக்கண் ‘கூ’, ‘க்’ கோ அவள் மதி வதனம்..

– ப்ரசன்ன ரணதீரன் புகழேந்தி 💓

#புதியகம்பன்

​விட்டுகொடுத்தல் ஒரு துறவுநிலை!

​விட்டுகொடுத்தல் ஒரு துறவுநிலை!

தாய் வந்து கேட்டால் அன்பை விட்டு கொடு…
தந்தை வந்து கேட்டால் அறிவை விட்டு கொடு…

நண்பன் வந்து கேட்டால் நன்றியை விட்டு கொடு…

காதலி வந்து கேட்டால் காதலை விட்டு கொடு…

மனைவி வந்து கேட்டல் ஊடலை விட்டு கொடு…

பிள்ளைகள் வந்து கேட்டால் உயிலை விட்டு கொடு…

காலன் வந்து கேட்டால் உயிரை விட்டு கொடு…

அந்த இறைவனே வந்து கேட்டால் அனைத்தையும் விட்டு கொடு…


♥♥பிரசன்ன ரணதீரன் புகழேந்தி♥♥
#புதியகம்பன்

நயன மொழி – சிறுகதை

நயன மொழி – சிறுகதை

‘படார்’ என கீழே விழுந்தான் கயிறு அறுந்துவிட்டது போலும் இடுப்பு முறிந்திருக்ககூடும் ஆனால் அது நடக்கவில்லை கொஞ்சம் வருத்தம் தான் கார்க்கிக்கு “என்னாடா இது சாவு கூட நமக்கு சதி பண்ணுது தூக்குல தொங்கி போய் சேரலாம்னா இப்படி ஆயிருச்சு… ச்சீ”

என தன்னை தானே நொந்து கொண்டு புலம்பினான். நள்ளிரவு இரண்டு மணி இருக்கும் சாகவும் முடியாமல் தூங்கவும் முடியாமல் தத்தளித்தான். இவன் புலம்பலை பார்த்தவர்களுக்கு இவன் செத்தே போய்ருக்கலாம் என்று தான் தோன்றும் ஆனால் அதற்கும் ஒரு கொடுப்பனை வேண்டுமே அது தான் இவனுக்கு வாய்க்கவில்லையே. இவன் செத்தாலும் இவனுக்காக கண்ணீர் சிந்த ஆளில்லாத போது இவன் வாழ்ந்து யாருக்கென்ன லாபம் ஒருவேளை இவன் நண்பர்கள் அருகில் இருந்திருந்தால் அந்த அபிப்ராயத்தை மாற்றிக்கொண்டிருப்பானோ என்னவோ அதற்கும் கொடுத்து வைக்கவில்லை இருவரும் குடும்பஸ்தன் ஆகிவிட்டார்கள்.

செய்து வந்த வேலையும் இல்லை காதலித்த காதலியும் இல்லை. கல்யாணம் செய்து வைக்ககூட ஆளில்லை என விரக்தியினால் தான் சாகவும் துணிந்தான் ஆனால் சாவுக்கு கூட இவனை கண்டால் பிடிக்கவில்லை என்ன காரணமோ யாருக்கு தெரியும்.

புலம்பி கொண்டே தூங்கிவிட்டான் விடியலும் வந்தது கதவை தட்டியது திறந்து பார்த்தான் பக்கத்து வீட்டு நாரயணன் தான் அது “தம்பி! குடும்பத்தோட திருப்பதி போரோம், வர நாலஞ்சு நாள் ஆகும் யாரவது கேட்டாங்கனா சொல்லிருங்க தபால் வந்தாலும் வாங்கி வைங்க தம்பி” என சொல்லிவிட்டு சென்றுவிட்டார்.

“இது வேரயா” என தலையில் அடித்து கொண்டு உள்ளே போனான், கைப்பேசி அழைத்தது அழைப்பில் அவன் நண்பன்.

“என்னடா எப்படி இருக்க? பேசி ரொம்ப நாளாச்சு, நல்லா இருக்கியா!”

“நேத்து நான் சூசைடு பண்ண டிரை பண்ணேன்”

கரகரத்த குரலில் “என்ன என்ன சொன்ன”

“தூக்கு மாட்டி தற்கொலைக்கு முயற்சி பண்ணேன் கயிறு அருந்துறுச்சு”

கோவமாக “டேய்! நீ என்ன லூசா இப்ப எதுக்கு நீ இப்படிலாம் பண்ணிட்டு இருக்க?”

“என்னால முடிலடா காதலிச்சவலும் வேணாம்னு வேரொருத்தன கல்யாணம் பண்ணிட்டு போய்ட்டா இருந்த வேலையயையும் தூக்கிட்டாய்ங்க இனி என்னடா பண்றது நான் இந்த உலகத்துல இருந்து என்ன பண்ண போறேன்”

“டேய் சாவு எல்லாருக்கும் வர தான் போது அது எப்ப வருதுனு தெரியாம இருக்கறதுல தான் சுவாரஸ்யமே…. உன்ன வாரி அனச்சுக்க அவன் விரும்பல அதுனால நீ இந்த பூமிக்கு பாராமா இருந்து தான் ஆகனும். முட்டாள்தனமா யோசிக்காம வேற வேலைய தேடு”

“நீ எவ்ளோ சொன்னாலும் என் மனசு ஆற மாட்டேங்குது. எனக்கு மட்டும் ஏன்டா இப்படி நடக்குது”

“டேய் எல்லாரும் இங்க நொம்பலத்துல தான்டா இருக்கோம் இதலாம் சமாளிச்சுட்டு தான்டா முன்னேறனும்… ரோட்ல போய் ஒவ்வொருத்தன் முகத்தையும் பாரு ஆயிரம் கத சொல்லும்”

“இருந்தாலும் எனக்கு வந்த தனிமையும் வெறுமையும் என்ன கொல்லுதுடா!”

“இங்க பாரு ஒன்னுமில்ல சௌஹந்திய அவுங்க அம்மாகிட்ட சொல்லி உனக்கு நல்ல பொன்னா பாக்க சொல்லிருக்க அடுத்த மாசம் நாங்க இந்தியா வரோம் வந்து உன் கல்யாணத்த முடிச்சிட்டு தான் மறுவேளை சரியா… அதுவரைக்கும் மனச போட்டு குழப்பிக்காமா டூரு கீரு போய்ட்டு வா நம்ம படிக்கும் போது போவம்ல அங்கலாம் போ”

“ம்ஹூம்”

“டேய் சொல்ரத கேளு போய்ட்டு வா நாங்க ஊருக்கு வரதுக்கும் நீ போய்ட்டு வரதுக்கும் கரக்டா இருக்கும்… பணம் இருக்க இல்லனா அம்மாகிட்ட வாங்கிகோ”

“இல்ல அதலாம் இருக்கு”

“சரி பாத்துக்க நான் நாளைக்கு பண்றேன் பாய்”

“ம்ம் சரிடா பாய்”

வெகுவாக யோசித்தான் “ம்ம் அவன் சொல்றத தான் கேட்போமே, அங்க பேனானாச்சும் எதாவது வழி கிடைக்குதானு பார்ப்போம், போய் சேர்றதுக்கு” என முனுமுனுத்தான்

கையில் இருந்த பணத்தையெல்லாம் அள்ளி போட்டுக் கொண்டு கிளம்பினான்.

மறுமுனையில் ராதா கதறி கொண்டிருந்தாள் “ஏங்க நமக்கு தான் குழந்த பொறக்க போதுல அப்புறம் இது எதுக்குங்க நமக்கு, பேசாமா இத எங்காயவது அனுப்பிவிடுங்க”

“ஏய் பாவம்டி வாயில்லா பூச்சி அதுப்பாட்டுக்கு இங்க இருக்கட்டுமேடி” என்றான் ரங்கநாதன்.

“முடியவே முடியாது எனக்கு இது இங்க இருக்ககூடாது எங்காயவது போய் தள்ளிவிட்டு வாங்க”

இருவரின் சம்பாஷனைகளும் கண்மணிக்கு புரிந்துவிட்டது போலும் வெளியே சென்றாள் சில வேடிக்கை மனிதர்களை பார்த்து கொண்டிருந்தாள் மறுபடியும் உள்ளே சென்று ஒரு ஓரமாக அமர்ந்தாள் இன்னும் அதே பேச்சுதான் “நம்மள பிடிக்கல போல” என்று தனக்குள்ளே பேசி கொண்டாள்.

“சரி சரி கொண்டு போய் விட்டுரேன் நீ கொஞ்சம் வாய மூடுறியா தாயே” என அலுத்து கொண்டான் ரங்கன்.

எங்கே கொண்டு போய் விடுவது என ரங்கனுக்கு குழப்பம் எங்காவது போய் தொலைச்சுட்டு தான் வரனும் என முடிவு கட்டினான்.

“கண்மணி! வா போலாம் அப்பா உன்ன வெளிய கூட்டிட்டு போரேன்”

அதற்கு என்ன தெரியும் வாய் பேச தெரியாத ஒரு அற்ப ஜீவன் ஆனால் இரண்டு கண்கள் இருக்கிறதே அதில் எல்லாம் தெரிகிறதே கண்மணியின் கண்களில் நீர் தேங்கியது இருந்தும் தந்தை சொல் கேட்டு பின்னே ஓடியது.

இரவு பத்தாகிவிட்டது இருவரும் காரில் ஏறி புறப்பட்டனர். வழியில் எங்கே விடுவதென ரங்கனுக்கு ஒரே குழப்பம். சட்டேன இவர்களை கடந்து சென்றது பேருந்து. காரும் சரிசமமான வேகத்தில் சென்று கொண்டிருந்தது. பேருந்தின் ஜன்னல் வழியே ஒன்று அடிக்கடி எட்டிப்பார்த்தது பின்பு முற்றுமாக தலையை நீட்டிவிட்டது.

இப்பனாச்சும் நமக்கு சாவு வருதானு பாப்போம் என ஜன்னலின் வழியே பார்த்தபடி எண்ணி கொண்டிருந்தது.

“டேய் சாவனும்னா ரோட்ல வந்து சாவுடா” என கார்க்கியை பார்த்து முனங்கினான் ரங்கன் அப்போது தான் பேருந்தை கவனித்தான் பேசாமா இங்க கொண்டு போய்விட்டுறுவோம் இது தான் கரக்ட் என பேருந்தை துரத்தினான்.

நள்ளிரவு ஒரு மணி இருக்கும் பேருந்து திருப்பதி பேருந்து நிலையத்தை அடைந்தது. நள்ளிரவானாலும் ஜனகூட்டம் அங்கும் இங்கும் அலைந்து கொண்டிருந்தன எதோ ஒரு தேடலுக்காக தான் அத்தனை கூட்டமும் சுற்றி கொண்டிருக்கிறது.

ஒரே களைப்பு கார்க்கி பேருந்து நிலையத்திலே அமர்ந்துவிட்டான் பக்கத்தில் குஜராத்தி மராத்தி என வட வாடை கொஞ்சம் தெலுங்கு வாடையும் அடித்தது.

ரங்கனும் பேருந்து நிலையத்திற்கருகே காரை நிறுத்தினான். கண்மணியை அழைத்து கொண்டு நிலையத்தை நிலை கொள்ளாமல் சுற்றினான். அப்போது கழட்டிவிடலாம் இப்போது ஏமாற்றிவிடலாம் என நப்பாசையில் இருந்தான் ரங்கன் ஆனால் கண்மனிக்கு கொஞ்சம் புத்தி கூர்மை அதிகம் அவன் நடையசைவை அப்படியே கவனித்து பின் தொடர்ந்தாள். இருந்தாலும் ரங்கனுக்கு அடித்தது யோகம் மூன்று பேருந்துகள் உள்ளே வந்தன. ஜனகூட்டம் முந்தியடித்து வந்தது அதற்குள் நுழைந்தான் கண்மணியும் நுழைந்தாள். ஒருகட்டத்தில் கண்மணி நம்மள தான் பிடிக்கலயே என்ற தன்னிலை உணர்ந்தாள். கூட்டம்  மெள்ள கரைந்தது ரங்கனை காணவில்லை கண்மணி மட்டும் அங்கும் இங்குமாக அலைந்தாள். பேருந்து நிலையத்தையே சல்லடையிட்டு தேடினாள் கார் நிறுத்திய இடத்தில் கூட தேடிவிட்டால் ஆனால் எங்கும் காணவில்லை. கண்கள் சுறுங்கின கண்ணீர் பெருக்கெடுத்தது கொஞ்ச நேரம் அங்கேயே அமர்ந்துவிட்டாள் அவளும் என்னதான் செய்வாள் அவளுக்கு தான் தெரியுமே அதனால் தான் அப்பா இங்கு கொண்டு வந்து நம்மை விட்டுவிட்டார் இனி நாம் யாரும் இல்லாத அனாதை சோறு போட்டு அரவனைக்க எந்த நாதியுமில்லை. அவன் விட்டு சென்றதில் தவறொன்றுமில்லை  பெற்றால் தானே பிள்ளை, நாட்டில் அநேகம் பேர் இப்படி தான் செய்கிறார்கள் அதில் ரங்கன் மட்டும் விதிவிலக்கா என்ன? இனி யாரை தேடியும் பிரயோஜனமில்லை என தனக்குதானே ஆறுதல் கூறிகொண்டாள்.

கதிரவன் கண்விழித்த நேரம், இன்னும் ஓயவில்லை மக்கள் கூட்டம் பரபரப்பாக இயங்கி கொண்டிருந்தது திருப்பதி.

கார்க்கிக்கு முழிப்பு வந்தது தலைமாட்டில் கண்மணி உறங்கி கொண்டிருந்தாள் அவளை பார்த்த கணமே சட்டென எழுந்தான் அவன் எழுந்த அதிர்வு அவளையும் எழுப்பிவிட்டது. கார்க்கி தன்னைதானே ஆசுவாசப்படுத்தி கொண்டான். பையில் இருந்த வாட்டர் பாட்டிலில் வாயை கொப்பளித்து விட்டு ஒரு டீயும் பிஸ்கெட் பாக்கெட்டும் வாங்கி அங்கிருந்த பயணிகள் இருக்கையில் அமர்ந்தான் மெள்ள கண்மணியும் அவனை நொக்கி வந்தாள். அவனையே கண் கொட்ட பார்த்து கொண்டிருந்தாள். பாவம் பசி போலும் இரண்டு பிஸ்கட்டுகளை கொடுத்தான் சாப்பிட்டுவிட்டு மறுபடியும் பார்த்தாள் இன்னும் ரெண்டு கிடைத்தது. 
ஏனோ தெரியவில்லை அவள் மீது இவனுக்கு அவ்வளவு கரிசனம் ஏதோ பெற்றெடுத்த பிள்ளையை போல ஆனார் அவளுக்குஅப்படி ஒரு நினைப்பு இல்லை இருக்கவும் வாய்ப்பில்லை. கண்மணி அவனையே சுற்றி சுற்றி வந்தாள் அவனுக்கும் ஒருவாறு கண்மணியை பிடித்திருந்தது கூட்டி கொண்டு போய் வளர்க்கலாம் என்று தோன்றியது “ஆனா அவனுக்கு பொறுக்காதே” என மலை உச்சியை பார்த்தான்.

அவளுக்கும் இவன் மேல் அளவு கடந்த அக்கறை தான், இரண்டு பேருந்துக்கு நடுவில் எலியை போல் சிக்கி சனநேரம் போய் சேர்ந்திருப்பான் ஆனால் அவள் குறுக்கிட்டு ஓட்டுனரை அலற வைத்தாள். ஒரு வழியாக இவன் வெறுமையும் தனிமையும் அவளால் மறைந்தது.

கார்க்கி இப்போது தயாராகினான், “மலைக்கு பஸ்ஸில் போகலாமா அல்லது நடைபாதை வழியாக போலாமா” என்று ஒரு சின்ன குழப்பம். பிறகு “சீக்கிரம் மலைக்கு போய் என்ன செய்ய போரோம்” என்று மலைபாதை வழியா போலாம் என முடிவெடுத்து நகர்ந்தான்.

திருப்பதி அருகிலுள்ளஅலிபிரி சோதனை சாவடியை நெருங்கினான் அதுவரை கண்மணியும் அவனை பின் தொடர்ந்து வந்தவள் இப்போது காணவில்லை அவனுக்கு ஒன்றும் புரியவில்லை  மேலும் சோதனை சாவடியில் சோதனைகளை முடித்து கொண்டு மலைபாதையில் ஏற தயாரானான். ஒரு நிமிடம் திரும்பி சுற்றும் முற்றும் பார்த்தான் கண்மணியை காணவில்லை.

எங்கே போனதென்று தெரியவில்லை ஏனோ அவனுக்கு இனம்புரியாத பினைப்பு உண்மையிலே அது ஒரு இனம்புரியாத நயன மொழி. இருவருக்கும் பூர்வ ஜென்ம பந்தமாக இருக்கலாம். அந்த ஏகாந்த பார்வை, கண்கள் பேசும் நயன மொழி அந்த ஆத்மார்த்தமான உடல்மொழி என அவள் கனிவான சம்பாஷனை அவனை என்னனமோ செய்தது. காலையில் அவன் காலை சுற்றியே வந்து கொண்டிருந்தவள் இப்போது காணவில்லை. நிரந்திரமற்ற வாழ்வில் நிரந்திரமான உறவுகள் கிடைக்க ஏங்குவது நியாயமில்லை தானே.

இன்னும் சுமார் பத்து கிலோ மீட்டர் இருக்கிறது ஏழுமலையானை தரிசிக்க ஆகயால் மெள்ள நடக்க தொடங்கினான் ஒவ்வொன்றாக ரசிக்க தொடங்கினான். ரசனை இல்லாதவன் மனிதனே இல்லை தானே? சக பாதசாரிகளை பச்சையிலைகளை பொன் மேகங்களை வண்ணத்து பூச்சிகளை கலைநயமிக்க சின்னஞ்சிறிய வேலைபாடுகளை கண்டு மெய்சிலிர்த்தான்.

நேற்று நடந்ததிலுருந்து மீண்டு வந்தாலும் ஏதோ ஒரு தனிமை அவனை வாட்டி கொண்டே தான் இருந்தது. ஒய்வு அறை வந்ததும் அவன் உடல் ஓய்வு கொண்டது ஆனால் அவன் மனம் நிலை கொள்ளவில்லை. மலை ஏற தொடங்கினான் பாபவிநாசனம் வந்தவுடன் ஒரு குளியல் பின்பு அண்ண பிரசாதம் கொஞ்சம் இனிமையான பாடல்கள் என புங்கை மரத்தடியில் குயிலின் இனிய கீதங்களோடு அந்த மெல்லிய தருணங்களை ரசித்தான். திடிரென கண்மணி அவன் பின்னாலிருந்து வந்தாள் கொஞ்சம் ஆச்சர்யம் தான். இப்போது அவன் இதழோரம் ஒரு சிறிய புன்னகை. நமக்காக இறைவன் கொடுத்த வரமா என்ன “கூட்டிட்டு போய் நம்மளே வளர்த்துகளாமா, யாரவது வந்து கேட்டா? தேடுனா? தொலைச்சுட்டு போயிருந்தா? நம்மளயே சுத்தி சுத்தி வருதே”

“ஏய் உன் பேரு என்ன, என்கூட வர்றியா” அவளுக்கு தான் பேச வராதே பேசாவிட்டால் என்ன அந்த கண்கள் பேசிய நயன பாஷை தான் அவளுக்கு புரியுமே மெள்ள அவன் அருகில் வந்து தலையசைத்து பக்கத்தில் உட்கார்ந்துகொண்டது.

“ஏய் மணி ஏய் மணி” என ஒரு குரல் கூக்குரலிட்டு கொண்டே வந்தது கண்மணியை பார்த்து “ஏய் இங்க வந்துட்டியா” என வாயேடுக்கும் போது காரக்கியை பார்த்து கொஞ்சம் திடுக்கிட்டாள் அந்த இளம்பெண். அவளுக்கு எப்படி பேர் தெரியும் கண்மணியும் சொல்லியிருக்க முடியாது ஒருவேளை அவளுக்கு பிடித்த பெயராக இருக்கலாம் ம்ம்.

“நீங்க தான் கூட்டிட்டு வந்தீங்களா!” என்றாள்

“இல்லங்க நான் இல்ல”

“இல்ல காலைல இருந்து திரு திருனு முழிச்சிட்டு இருந்துச்சா, அதான் கேட்டேன்”

“இல்லங்க எனக்கு எதும் சம்பந்தமில்ல”

“ஃப் யூ டோன்ட் மைன்டு நான் கூட்டிட்டு..”
என இழுத்தாள்.

“தாராளமா” என வாய் வார்த்தையாக சொன்னான்.

“யார யாரு தாரைவார்க்குறீங்க” என்ற தொனியில் கண்மணி அவர்கள் உரையாடலை பார்த்து கொண்டிருந்தாள்.

ஏனோ கண்மணிக்கு கார்க்கியை பிரிய மனமில்லை. அவனுக்கோ அவளை பிரிய மனமில்லை அவள் பேச்சு அவள் கண்கள் என அவனை மறுபடியும் காதலெனும் கடலில் தள்ளப்பார்த்தது. அவளுக்கும் கூட இவனை எங்கோ பார்த்த ஞாபகம் ஒருவேளை அவனை புகைப்படத்தில் பார்த்திருப்பாள் அதை அவள் தாயே காட்டியிருப்பாள்.

“ஏதோ நமக்கு கடவுள் வரம் கொடுத்தான்னு நினச்சோம் ம்ஹூம்” என மனதிற்குளே நினைத்து கொண்டு மேலே செல்ல ஆயத்தமானான்.

அநேகமாக வந்து சேர்ந்துவிட்டான் ‘ஆஹா என்ன அழகு’ மேலேயும் மக்கள் கூட்டம் அங்கும் இங்குமாக சுற்றி கொண்டிருக்கிறார்கள் யாரை தேடுகிறார்களோ ஒருவேளை அந்த பாலாஜியையா! அவனை தேட சன்னதிக்கு தானே செல்ல வேண்டும்.

இயற்கையின் கொள்ளை அழகும் அந்த பரவசமும் என்னமோ செய்தது. நடு நடுவே அவள் முகம் வந்து போனது. இப்போது அவன் மனம் வாழ துடிக்கிறது அவள் கண்களுக்காக அவள் பேச்சுக்காக அவள் இதயத்திற்காக. கண்மணியை கூட மறக்க செய்த அவள் முகம் அவளை காண எத்தனித்தது. அவன் கீழே தான் இருப்பாள் அவனது சப்கான்ஷியஸ் சொல்லிகொண்டே இருந்தது அது அவனை கீழேயும் கொண்டு வந்து விட்டது. பார்வை அங்கும் இங்கும் பரபரத்தது.

திடிரென அவன் சமீபத்தில் அவளை போன்ற ஒரு கவிதை நிழல் உருவம் மெள்ள அருகில் வந்தது சட்டென கண்மணி அவன் காலருகே தாவினாள். “உங்கள தான் தேடுனோம் நீங்களே வச்சுக்கோங்க, அவளுக்கு உங்கள தான் ரொம்ப பிடிச்சிருக்கு” என குமட்டு புன்னகையுடன் எனக்கும் தான் என்ற தொனியில் சொல்லிவிட்டு கண்மணியை அவனிடம் விட்டுவிட்டு சென்றாள்.

வேகமாக பாய்ந்தோடி வந்த கண்மணி அவன் மீது தாவினாள் ‘படார்’ என கீழே சாய்ந்தான் முன்னங்கால்களால் அவன் மீது ஏறி அவன் முகத்தில் முத்த மழை பொழிந்தாள் அவனை தன் எச்சிலால் குளிப்பாட்டினாள் அவனுக்கும் அதில் மிக்க ஆனந்தம். அவனை முட்டி தள்ளி மூர்ச்சையற்றாக்கினாள். வாலை ஆட்டி கொண்டே அவனை பார்த்து குரைத்தாள் கொஞ்சினாள் கூத்தாடினாள். அந்த வால் ரோமங்களால் அவனை வருடினாள். இடைவிடாமல் அவனை பார்த்து குரைத்து கொண்டே இருந்தாள் ஆனால் அவன் கண்களோ அவளையே பார்த்துகொண்டிருந்தது.

– பிரசன்ன ரணதீரன் புகழேந்தி

பாகுபலியை ஏன் நாம் கொண்டாடுகிறோம்?

பாகுபலியை ஏன் நாம் கொண்டாடுகிறோம்?


காஷ்மீர் முதல் கன்னியாகுமரி வரை எங்கு பார்த்தாலும் சினிமா ரசிகர்கள் உச்சரிப்பது ஒரே ஒரு வார்த்தையைதான் அது தான் பாகுபலி. அமைச்சர் முதல் சாமானியன் வரை எல்லோரும் சிலாகித்து பேசுகிறார்கள் படத்தை பார்த்துவிட்டு கொண்டாடுகிறார்கள் ஆனால் நம் பாட்டன்களும் பாட்டிகளும் இந்த திரைப்படத்தை எளிதாக கடந்து செல்கிறார்கள் எப்படி அவர்களால் முடிகிறது? ஏன்னென்றால் இது அவர்களுக்கு புதிதல்ல மன்னாதி மன்னன், பாக்தாத் திருடன், மலைக்கள்ளன், கர்ணன், ராஜ ராஜ சோழன், வஞ்சிக்கோட்டை வாலிபன் என எம்ஜிஆரும் சிவாஜியும் போதா குறைக்கு ஜெமினியும் கலந்து கட்டி சலிக்க சலிக்க அவர்கள் கண்கள் பார்த்து சலித்ததை தான் நாம் இன்று கொண்டாடுகிறோம் ஆகயால் பாகுபலியை பார்க்கும்போது அவர்களுக்கு சற்று டொங்கல் போல தான் தெரியும். 

இப்போது நாம் செய்யும் கொண்டாடத்திற்கும் ஓர் காரணம் உண்டு சுமார் இரண்டு தலைமுறைகளாக அதாவது கமல்-ரஜினி ஆளுமையிலும் சரி இப்போது விஜய்-அஜித் ஆளுகையிலும் சரி சரித்திர பின்னனியில் நம் தலைமுறை படம் பார்ததேயில்லை. அப்படியிருக்க பாகுபலியை போல ஒரு சரித்திரத்தை இந்திய சினிமாவில் பார்க்கும் போது மனம் லயிக்க தான் செய்கிறது. இம்சை அரசன்  23ம் புலிகேசிக்கு பிறகு தமிழ் மக்கள் பார்க்கும் முழு நீள சரித்திர படம் என்பதால் நமக்கு பெரிய விருந்தாக இருக்கலாம்.

மேலும் படத்தில் இடம்பெறும் பல உலக திரைப்படங்களின் தழுவல்களையும் பல சரித்திர நாவல்களின் சாயல்களையும் பார்த்தவர்களுக்கும் படித்தவர்களுக்கு மட்டுமே தெரிகிறது என்றால் இந்திய வாசகர்களும் ரசிகர்களும் பார்ப்பதிலும் படிப்பதிலும் இன்னும் சற்று கிழே தான் இருக்கிறார்கள் என்று தான் தோன்றுகிறது.

குறிப்பாக திரைப்படத்தில் மகாபாரதமும் பொன்னியின் செல்வனும் பல இடங்களில் நினைவுப்படுத்துகிறது.  முதல் பாகத்தில் சிவகாமி தேவி குழந்தையை ஆற்றில் தூக்கி வரும் காட்சியே பொன்னியின் செல்வன் நாவலின் தலைப்பின் காட்சி தான் ராஜராஜ சோழனை மந்தாகினி தேவி தூக்கி வரும் காட்சியை கல்கி விவரிக்கும் போது வாசகனுக்கு மயிர் கூச்சம் ஏற்பட்டிருக்கும். மேலும் பிங்கலதேவனாக வரும் நாசரை மகாபாரத திருராட்டிரராக பல்வாள்தேவனை துரியோதனனாக பாகுபலியை அர்ஜுனனாக தேவசேனாவை திரௌபதியாக பாரதத்தை படித்தவர்களால் பார்க்கமுடிகிறது. அதை காட்சிபடுத்திய விதத்திலும் நம்மால் உணர முடிகிறது. திருராட்டிரரின் ஊனத்தால் ஆட்சியுரிமை மறுக்கபட்டது (பிஜிலதேவனுக்கு ஆட்சியுரிமை மறுக்கபடுகிறது), துரியோதனன் இளவரசனாகவும் முடியரசனாகவும் பதவி ஏற்றது (பல்வாள்தேவன் பட்டாபிஷேகம் நடக்கிறது),  பாஞ்சாலியைஅஸ்தினாபுர சபையில் மானபங்கபடுத்தியது (கர்ப்பினியான தேவசேனாவை மகிழ்மதி சபையில் சிறைபிடிப்பது), பாண்டவர்களும் பாஞ்சலியும் வனவாசம் செல்வது(பாகுபலியும் தேவசேனாவும் கோட்டையை விட்டு வெளியேறுவது) என சகலமும் பாரத மயம்.

கட்டப்பா ஏன் பாகுபலியை கொன்றான் என்பதை சரித்திர கேள்வியாக்கி உலாவவிட்டதின் பதிலை சற்று மேம்போக்காக சினிமா கிளிஷேவாக பதில் சொல்லிவிட்டதை போல தான் தோன்றுகிறது.

அந்த சரித்திர கேள்வியில் கூட பொன்னியின் செல்வன் வாசம் வீசுகிறது. ஜம்பதாண்டுகளாக ஆதித்ய கரிகாலனை யார் கொன்றார் என்ற கேள்விக்கு விழிபிதுங்கி தான் நின்று கொண்டிருக்கிறார்கள் பொன்னியின் செல்வன் வாசகர்கள். அந்த கேள்விக்கு அமரர் கல்கிக்கு மட்டும் தான் விடை தெரியும் என்பது சரித்திரக் கொடுமை.

ஒருவேளை கமல்ஹாசன் மருதநாயகத்தையும் ரஜினிகாந்த் ராணாவையும் வெளியிட்டிருந்தால் இவ்வளவு சிலிர்ப்பு ஏற்ப்பட்டிருக்காதோ என்னவோ! அதிலும் செல்வராகவனின் ஆயிரத்தில் ஒருவனை சிலாகிக்காத கதை தனிக்கதை.

ஒரு இயக்குனராக ராஜமௌலியை பாராட்டாமல் இருந்தால் சினிமா ரசிகனாக இருப்பதில் அர்த்தமே இல்லாமல் போய்விடும திரைப்படத்தின் முதல் பாகத்திலும் சரி இரண்டாம் பாகத்திலும் சரி அந்த இடைவெளி காட்சிக்காகவே ராஜமௌலியை கொண்டாடலாம் மேலும் இரண்டாம் பாக இடைவேளை டைட்டில் கார்டில் “மகிழ்மதியே இளைப்பாறு” என்று குறிப்பிடுவதை போல மக்களும் தங்களை ஆசுவாச படுத்தி கொள்ள வெகு நேரம் பிடித்தது. 

ஜனரன்ஜகமாக கையாண்டவிதத்தையும் சின்ன சின்ன நுண்ணிய விடயங்களை கவனித்து எடுத்தவிதமும் சரி ராஜமௌலி பக்கா கிளாஸ் (சிவு-தமன்னா ஓவியம் வரைதல், பாகுபலி-தேவசேனா அன்னப்படகு ஏறுதல், காளகேயர்களை தீகம்பளம் கொண்டு வதம் செய்வது, மாடுகளின் கொம்பை பற்ற வைத்து விடுவது, சிவகாமி மற்றும் தேவசேனாவின் அடி மேல் அடி இடையுறு) என சொல்லி கொண்டே போகலாம் இன்னும் முக்கியமாக சொல்லவேண்டுமென்றால், பாரதத்தில் திரௌபதி துகிலுரித்த போது பாண்டவர்கள் மண்டியிட்டு கிடந்தார்கள் ஆனால் பாகுபலியிலோ தேவசேனவை மகிழ்மதி சபையில் சிறை பிடித்த போது பாகுபலியின் வசனமும் செய்கையும் தற்போதுள்ள இந்திய சூழ்நிலையின் பிரதிபலிப்பாகத்தான் உள்ளது அதற்கு திரையரங்கில் ஒலிக்கும் ஆரவாரமும் கரகோஷமுமே சாட்சி (மிகவும் ரசித்த காட்சி).

எது எப்படியோ உலக சினிமா ரசிகர்கள் தங்கள் பங்குக்கு பென்ஹர், டிராய், கிளாடியேட்டர், 300 என்று சொன்னால் இந்திய ரசிகர்கள் பாகுபலி 1, 2 என்று பெருமையுடனே சொல்லிக்கொள்ளலாம்.

– பிரசன்ன ரணதீரன் புகழேந்தி